[:IS]
Góður maður sem starfar innan ferðaþjónustunnar sagði við mig að það væri alltaf gott að félagsmenn SAF hefðu valkosti þegar kæmi að formannskjöri í félaginu.
Það hefur verið ánægjulegt að sitja í Bílaleigunefnd SAF undanfarin ár en jafnframt áhyggjuefni að á hverju einasta ári þegar kemur að fjárlagagerð ríkisstjórnarinnar að berjast þurfi harðri baráttu fyrir rekstrarumhverfi greinarinnar. Þrátt fyrir loforð um heildaryfirferð í mörg ár, hefur ekkert verið um efndir, sama hvaða flokkar skipa ríkisstjórn.
Vöxtur ferðaþjónustunnar undanfarin ár hefur verið með eindæmum en því miður verður það sama ekki sagt um arðsemi fyrirtækjanna sem starfa í greininni. Úr því þarf að bæta. Það gerist ekki nema allir standi saman, sama hvaða grein ferðaþjónustunnar þeir tilheyra. Hvað getum við sem samtök gert betur til að ná betri árangri og tryggja rekstrarumhverfi sem gerir ferðaþjónustunni allri kleift að blómstra? Eitt er klárlega það að öll fyrirtæki sem starfa í ferðaþjónustunni líti á það sem sjálfsagðan hlut að vera meðlimir og þátttakendur í starfi SAF. Við þurfum að læra af fortíðinni, lifa í núinu og skipuleggja til framtíðar. Saman. Arðsemi fyrirtækjanna tryggir bjarta framtíð Arðsemin fæst með sérhæfðu og betur menntuðu starfsfólki innan ferðaþjónustunnar, en í þeirri ánægjulegu þróun sem við höfum þegar séð í þeim málum þarf að fjárfesta.
Þar sem við búum á eyju, þurfum við að koma á fót verkefnum og fjárfesta þannig að ferðamenn geti komið inn til landsins bæði norðanlands og austan, rétt eins og fyrir sunnan. Stuðla þannig að betri dreifingu ferðamanna og arðsemi fyrir allar greinar ferðaþjónustunnar um landið allt.
Ég hef starfað í ferðaþjónustunni sem framkvæmdastjóri Bílaleigunnar Geysis frá árinu 2009. Áður var ég framkvæmdastjóri Golfklúbbs Reykjavíkur á árunum 1998 – 2006 og starfaði einnig sem forstöðumaður í Sparisjóðabankanum. Hef setið ýmist sem aðal- eða varamaður í Bílaleigunefnd SAF frá árinu 2011.
Áfram SAF.
Virðingarfyllst,
Margeir Vilhjálmsson[:]
