Um miðjan september mælti fjármála- og efnahagsráðherra fyrir stjórnarfrumvarpi um breytingu á ýmsum lögum vegna fjárlaga 2024. Frumvarpinu er ætlað að hafa bæði áhrif á tekju- og gjaldahlið fjárlagafrumvarpsins. Samtök ferðaþjónustunnar skiluðu umsögn um frumvarpið 3. október 2023.
Orkuskipti á leið í vaskinn
SAF bentu á í umsögn sinni að ökutækjaleigur hefðu þungar áhyggjur af fyrirhuguðum orkuskiptum og mótmæla því að VSK verði lagður á endursölu og útleigu vistvænna bílaleigubíla. Samtökin hafa á sl. árum bent á að niðurfelling VSK af umræddum bílum kemur skattskildum aðilum eins og ökutækjaleigum ekki til góða, enda ljóst að álagning VSK á endursölu bíla skaðar samkeppnisstöðu ökutækjaleiga á eftirmarkaði.
Þá kemur fram í umsögninni:
„Endurkrafa hins opinbera á VSK ívilnun bíla sem ökutækjaleigur hafa fjárfest í hefur grafalvarlegar afleiðingar fyrir orkuskipti á Íslandi. Líklegt er að ökutækjaleigur leiti allra leiða til að nýta ökutæki inni í rekstrinum eða losi ökutæki inn á hagkvæmari markaði. Boðaðar breytingar munu því draga verulega úr orkuskiptum hjá ökutækjaleigum og þar með auka líkur á að orkuskipti almennt fari í vaskinn.“
Áfengisgjöld eru há í alþjóðlegum samanburði
Samtökin telja betur látið staðar numið en af stað farið þegar kemur að hækkun hins opinbera á krónutölugjöldum. Miðað við núverandi efnahagsástand telja SAF að eðlilegra væri að stjórnvöld myndu því láta krónutöluhækkanir eiga sig í bili, enda ætti hlutverk þeirra hvorki að vera til þess fallið að kynda undir né leiða verðlagshækkanir. Samkeppnishæfni áfangastaðarins Íslands verður ávallt að hafa að leiðarljósi. Þá benda samtökin á að áfengisgjöld séu há hér á landi í alþjóðlegum samanburði og rík þörf sé á heildstæðri endurskoðun á þeirri gjaldheimtu.
Í umsögn SAF kemur m.a. fram:
„SAF ítreka mikilvægi þess að endurskoða þurfi gjaldtöku og almenna skattheimtu á áfengi, enda gjaldið allt of hátt í alþjóðlegum samanburði. Þangað til og á meðan sú endurskoðun fer fram telja SAF að engar breytingar skuli gerðar á gjaldinu til hækkunar.“
