Í tilefni af kvennafrídeginum 2023 var Bjarnheiður Hallsdóttir, formaður Samtaka ferðaþjónustunnar, í viðtali á Turisti.is um stöðu kvenna í íslenskri ferðaþjónustu. Þar rifjar Bjarnheiður upp hvernig tíðarandinn hefur meðal annars breyst til hins betra í atvinnugreininni:
„Þegar ég hóf störf í ferðaþjónustu fyrir um 30 árum, þá var hún karlaveldi – hvernig sem á hana var litið. Henni var stjórnað af körlum að langmestu leyti og þeir opinberu starfsmenn, sem höfðu með málefni hennar að gera, voru líka karlar. Þetta hefur gjörbreyst. Að vísu eru ekki margar konur sem stýra allra stærstu fyrirtækjum greinarinnar (frekar en í öðrum atvinnugreinum) en þær eru óteljandi, þegar kemur að litlum og meðalstórum fyrirtækjum, sem eru mörg í eigu kvenna og stýrt af þeim. Konur eru sömuleiðis mjög áberandi í stöðum millistjórnenda í ferðaþjónustu, í öllum greinum hennar.“
Samtök ferðaþjónustunnar styðja heilshugar og hafa lengi beitt sér fyrir jafnfrétti á vinnumarkaði. Formaður SAF, og varaformaður Samtaka atvinnulífsins, er kona. Í stjórn Samtaka ferðaþjónustunnar sitja 4 konur og 3 karlar. Þá hafa síðustu þrír ráðherrar málaflokksins verið konur, og forstöðumenn ýmissa stofnana sem snerta ferðaþjónustu eru konur. Bjarnheiður segir þar að auki:
„Konur hafa því mikil áhrif innan greinarinnar og almennt er mikill vilji til dæmis innan SAF að konur gegni þar áhrifastöðum, a.m.k. til jafns við karla.“
SAF óska konum og kvárum til hamingju með daginn.
